غمان ہیا جہانہ بو تنگ بیتی کڑیمان
متے کوئیت اسپرو ہوو تہ پوشیکو نہ تاب ئوئے
اشرو ہونی مہ ژانہ بو تنگ بیتی کڑیمان
ھیہ کلی عالمہ تہ غون خوش مہ کا نیکی
رے خیال و گومانہ بو تنگ بیتی کیڑیمان
ژنگین دی تہ لاڑیم رے چھاکومن تہ دُوختو
نو لے تہ، تہ شرانہ بو تنگ بیتی کڑیمان
آسمان چھتی مہ سورو دیروغون ساریران
یاری نو پرایے زمانہ بو تنگ بیتی کڑیمان
کیچہ بوم مہ آللّہ ہے دوست مہ سر بو دودییری
ہوت بیکو تاب دیوانہ بو تنگ بیتی کڑیمان
کیڑیکا شیر شفا رے ہوسک ریکو عزاب ای
اللّہُ پرشٹہ آسمانہ بو تنگ بیتی کڑیمان
اِی گانہ کی پاشیمان اے شمع تہ روشیتو
نسین غیردی پروانہ بو تنگ بیتی کڑیمان
پوشی تہ شیلیو جنت مہ یادی گویان
دنیا ر بومان بیگانہ بو تنگ بیتی کڑیمان
شہ پھوری چھیر آپیکی نرگیس غیچی مہ مس موخی
بیکو مہ سار پھچانہ بو تنگ بیتی کڑیمان
اوا چے مہ ژان کی جنتہ دی جوست بوسی
رے غیژی بیابانہ بو تنگ بیتی کریمان
کی بیسیر بیسو مہ تے انصاف نیکی دنیا رے
عادل ہیہ دورانہ بو تنگ بیتی کڑیمان
No comments:
Post a Comment